لاتسأل حبيبي ليش حبيتك...

ماحبيت غيرك تدري كلش زين
واذا حبيت غيرك انت حبيتك
سميني بمزاجك وانت مامجبور
بس مجبور انه العين سميتك
عافيتي سلبتها من الصغر لليوم
لليوم تسئلني وتكلي شلون عافيتك
انه اعمى اصبحت ماظل نظر بالعين
وانت اوجوه ربعك عني عاميتك
دورتك فرح وعيوني تبجي عليك
ومايوم بثمن بدموعي داعيتك
يلشلتك حرز يحفظ محبتي وياك
وعيدية طفل للروح ظميتك
لاتكتل فرحتي وبيك خل ارتاح
ولاخر محطة وياي وديتك
اذا من عيني شلتك شلتك لان انت بعيد
بس شوف الورها بكلبي ضميتك
انه وياك رحنه وكلنه هسه نعود
ماتانيت روحي والله تانيتك
يالداخل بكلبي بغير دكة باب
وياباب الوفاء مايوم سديتك
اشعلك اي اشعلك واشتعل
وبنارك اني ارتاح
وبجيت كبال نارك لمن طفيتك
من اشتاك اطلعك العب اني وياك
ومن يخلص لعبنه لكلبي رديتك
وانت من اول انت وياي ضيم بضيم
كلت اصبر واشوف شلون تاليتك
يالهزاني شوكك سعفة بالرياح
وافرح لو كلت ياسعف هزيتك
يالحظة فرح والوكت كله احزان
مامحتاجك ادري لهذا ضميتك
اطيعك موغصب طبع اليحب يطيع
وانطيتك التاج وملك سميتك
شلون تريد اعوفك واني صايم بيك
واريد افطر صيامي وعيد تانيتك
انت تهمني كلك وانه مهتم بيك
واسودن اذا مايوم هميتك
كصيت الكلب من جدم حبك صار
وبذلة نفس مارحت جديتك
يانادر شتال وكوة كوة الكاك
عليك جفوفي طاحت يالله لميتك
تداويني بجرح وانه السهرت سنين
وكعدت كبال جرحك لمن داويتك
دفنت اسرار حبك دفنة المكتول
وبنار العشك ياذهب صفيتك
بعتك ماي وجهي وجان وجهك سيف
وانت بعزتك مايوم ذليتك
مثل ادم وحواء سنيني خلصت بيك
لاغشيتني ولا يوم غشيتك
رادو بيك اضيع وضيعوني وياك
ليل وعاصفة ومن بعيد شميتك
واجيت بلايه عين وكلبي شافك نور
شلون تضيع مني وبيه دليتك
اظن انت الوحيد العنده ثلث بيوت
بيت اهلك وعيني والكلب بيتك
لاتسئل

حبيبي شلون حبي وليش
احبك لاتكلي ليش حبيتك..